Française poésie

Poèmes en français


Sequestré pour jamais et du monde et de moy

Sequestré pour jamais et du monde et de moy
Et plus qu’onc esclairci de la douce lumiere
Dont l’Esprit donne-esprit par faveur singuliere
Me descouvre, bening, les secrets de la foy,

Que de divinitez en l’ame je conçoy,
Voire tant s’elargit sa grandeur familiere
Que le Ciel il m’octroye en jouissance entiere,
Et fait que mon Dieu mesme en esprit je cognoye :

Non qu’un extase ardent hors de moy me ravisse,
Ou qu’un brusque aiguillon les sens m’esvanouisse ;
Mais doucement porté dans son bien infini

Dardant les petits traits d’une amour toute intime
Je me sens au plus pur de son estre sublime
En son interieur parfaitement uni.


1 Star2 Stars3 Stars4 Stars5 Stars (1 votes, average: 5,00 out of 5)

Poeme Sequestré pour jamais et du monde et de moy - Pierre de Croix