Poeme Sur la louange de la Paix – Sonnet 8
Pour bien chanter de Paix et dire ses louanges
Aucun esprit ou voix humaine ne suffit :
Il nous faut rechanter ce que naissant le Christ,
Ce tresgrand Roy de Paix, chantoient au ciel les Anges.
Gloire soit au plus hault par les chans des Archanges
Au Dieu seul, qui jadis et ciel et terre feit :
Mais soit en terre Paix à tout homme qui meit
Ses pensées en Dieu de toute fraude estranges.
Ainsi nous faut la Paix et louer et chanter,
Ainsi nous faut les cueurs doucement enchanter
De ceux, qui hayent Paix et desirent la guerre.
Car tout le plus grand bien qu’on puisse souhaiter,
Pour ou l’esprit divin ou humain contenter,
Est au ciel gloire à Dieu, aux humains Paix en terre.
(1 votes, average: 5,00 out of 5)